Tena koutou

Ka whakatuwhera matou i tenei wharangi o te ipurangi mo to tatou nei kura, I tenei wa hirahira, ara ko Te Tuangahurutanga o Te Kura Kokiri.

Tekau tau tana pakeke inaianei, me tana huritau hei 10:10am 10/10/10.

I timata te kura i 10/10/2000 me te whakaaro kia rite katoa ona ahuatanga i mua i tana huritau tuangahuru. Kua rehitatia te kura, kua maro te huarahi, kua eke taumata, kua timata te wharekura, kua rite tona taha whare wananga, kua puawai nga paetahi, kua hoki mai etahi o nga tauira taketake hei kaiako, kua whai mokopuna hoki, engari mo te kura pumau, wahi tuturu kaore ano kia tutuki tera. Heoi ano, he tauira tonu tenei kaupapa. He tauira o te mana Maori motuhake, o te tino rangatiratanga, o te whai angitu ahakoa te poharatanga. Kua kite pai i roto i enei tau ka taea e te Maori ina ka noho pumau ki tona kaupapa. Na te aroha, na te whanaungatanga, na te ngakaunui o nga kuia me nga koroua me te kore tuohu ka toa.

Ka toa hoki to tatou reo rangatira. Inaianei, kei konei he huarahi kia haere tonu ma te reo Maori, mai te kohanga ki te kura kaupapa Maori, mai te kura kaupapa ki te Wharekura, mai te wharekura ki te wharewananga, mai reira ki nga tuunga mahi. I te timatatanga o Te Kura Kokiri, i kaha mea mai nga mea kore whakapono, moumou wa te ako i te reo Maori ma te reo Maori hoki, karekau he kura tuarua reo Maori, karekau he tumomo mahi mo te reo Maori, No tatou te honore kia takahi tera whakaaro kia kore e ara ai ano.

No reira koinei nga kaupapa me whakanui. Me whakanui to tatou Tauranga Moanatanga, me whakatairanga to tatou reo, me hiki kia rewa te mana Maori motuhake, te tino rangatiratanga o nga hapu. Me whakarite ano he rautaki tekau tau pea te roa, kia whanake haere, kia tutuki, whakamaua, kia tina. Tina. Hui e. Taiki e.

Papa Mark Nicholas

Tumuaki