whanui, i te poharatanga o te iwi, i te kuare o te tangata, i te pehitanga o te iwi taketake, i te taenga mai o te pakeha, i te waitohu o te Tiriti, i te kore e rawea, i te kore e whiwhia, i te kore. I whakaahua mai i te wawata o te po, i te tumanako o te tupuna mo tana mokopuna, i te moemoea o te iwi, i nga wananga korero i runga i nga marae, i te whakaparahako me te whakahawea, i te mohio ki te kore e whakaara, ka mate noa ka ngaro mo ake tonu atu.

I tinana mai tenei manu pirere i te kaupapa o te kohanga reo, i Te Aho Matua me te Runanganui, i te tautoko o nga tupuna, i te whakawhirinakitanga ki Ruamata, i te mana Maori motuhake me te Tino Rangatiratanga, i te whakaaetanga o nga iwi o Tauranga Moana, i te pono, i te tika me te aroha.

I hua mai na te taumaha, na te ngenge na te mamae me te kore tuohu o te whanau. Koianei nga pitopito tatai whakapapa kia waiho mo nga uri whakatipu. Koianei nga kaupapa kua tukua kia whakaea. Koianei nga mahi me whakaoti.

He kaupapa ma tatou katoa.

Kua puta mai tenei pae tukutuku hei whakatoopu a tatou kohinga korero kia whakanuia te Tuangahurutanga o Te Kura Kokiri. Hei turaki i nga ture me nga tikanga o te ao hurihuri e pehi nei i a taua te Maori, i a taua a Tauranga Moana he take kia hanga a taua ake hitori. Kia kaua tatou e wareware enei kaupapa hitori hei korerotanga ki a tatou uri whakatipu. Mai reira, ka ora ano tatou me a tatou kaupapa mo ake tonu atu.

Kia kaha ra Maori ma, otira Aotearoa ma. Kaua e tuku a tatou tamariki mokopuna ki te kura auraki. Kua puta mai nga rangahau e whakaata nei te pai me te tika, te whiwhi hua me te tu toa o nga tamariki i puta i te kohanga reo me te kura kaupapa Maori. Kaore kau he huarahi tu atu i tera Anei ke te ara kia whai angitu a tatou tamariki, otira a tatou whanau, marae, hapu, iwi.

Tena koutou katoa.

Mark Nicholas
021-799304